Pro 2 | WSK | STEP | Aga kuriang, ani munan den ka kausem mu ninguru ko ikiko. Ale anapeya bitarko ka manem mu me ko kamili sapurukko.

Proverbs 2

Ikia nunguning karo tui, mu ko koma yawara toko

1 Aga kuriang, ani munan den ka kausem mu ninguru ko ikiko.
Ale anapeya bitarko ka manem mu me ko kamili sapurukko.
2 Den nunguning ko ninguru ikiko,
ale ko nunguning ikiko ninguru sail tagirko.
3 Ikia nunguning toko ninguru isako,
ale ko nunguning ikiko ninguru aru ngatanguruko.
4 Ale ali ningi gold silver kupusan iwitata ninguru kupuko,
manga mel kariimet kaluwu betesan se ko kupusan iwitata, ninguru kupuko. ^{▼▼Pro 2:3-5 Ikia nunguning ko kuera: Pro 2; 4:1-9; Pro 8; Pro 9:10; 15:16; 23:23.}

5 Ni uwutata bitar, mu ni KARI BIYA bowa ningi bagara ko munan ninguru ko ikiko,
ale ni Kaem ninguru ko ikiko.
6 Mu awuk, KARI BIYA umutang ikia nunguning ko duap.
Se nu kota ikia ningo nanga kasurso.
7 Nu kariimet munan diram te la bagasan mu nunga karem bagoso.
Nu nunga sangarso ale nunga sinar taso.
8 Nu kariimet diram umutang nunga lakira bagoso,
ale kariimet noko kuesan mu nunga bitua kari bagoso.

9 Aga kuriang, ni ikia nunguning karo tui,
umutang ni munan ningo diram mu suen la ko ikiko,
ale munan ningo diram aguwaya te saki alo arungu bagerko mu ko ikiko.
10 Ni kari ikia ago ko aratuko,
ale ka ikia mu ko gemang amilmil ago la bagerko.
11 Ikia diram nikate mu yawarakala ka diruwurok,
ale yawarakala la ka bituokko.
12 Se ni kariimet munan memek betesan ale den ningo nuam me munakasan mu nogowom me karoko.

13 Kariimet umutang mu nuna lage ningo diram mu nubiring tusan,
ale lage memek tiromorom ago mu karo gilingisan.
14 Nuna kilek memek duap duap betemonko ninguru amilmila gilingisan.
15 Nuna kula kawel ko munan mu nongote tawun biya aniso.
16 Bare ni ikia nunguning ilukuawur mu te,
imet kuari ago bo kerak tere naukko gemang kulukuokko ago kaeruk,
ale den welang yawara ka manuk,
bare ikia nunguning umutang ikia ningo te ka diruwurok,
se ni imet mu ko kuring me karo tuiko.

17 Imet umutang nu kulak la Kaem koma te kari tam ale noko kuari ko balam,
bare aking ko kuari mu meso.
18 Se ni imet umutang ilak ko kawam te namar,
mu ni kuera ko lage te namasam.
19 Kari imet mu kote nama gilingisan, mu aking me pelesan taisan,
ale kari ningo marak yawara te ta ko lage karowasan mu arungak me karosan.

20 Bare ni ikia nunguning ago, mu ni kari ningo nuam nogowom karo ale diram la bagerko.
21 Mu iwita: kari munan diram karo tusan, mu ali imi te bagomonko.
22 Bare kari kilek memek betesan, mu ningam ningi sum memek bila warsan iwitata Kaem nunga gi warukko.